E relashon entre Hulanda i Antia ta na diskushon atrobe nèt despues di kambio di milenio. Esunnan ku ta na fabor òf kontra di e relashonnan di hopi siglo pasá t... » 

E relashon entre Hulanda i Antia ta na diskushon atrobe nèt despues di kambio di milenio. Esunnan ku ta na fabor òf kontra di e relashonnan di hopi siglo pasá ta molestiá otro ku tur klase di ekspreshon. Hopi di e ekspreshonnan aki ta mas bien basá riba puntonan di bista ku nan mes ta gusta, ku riba konosementu di e situashon real na Antia. Den e diskushon ekspreshonnan di paternalismo, kulpabilidat, kolonialismo i utopia ta sigui un tras di otro. E diskushon ta ser monopolisá tambe pa "opinion leaders". E buki aki, Yunan di Kòrsou, ta trata na duna un análisis for di punto di bista di e siudadano di e situashon sosial i gubernamental di e isla di mas grandi di Antia. E buki no ta sali for di puntonan di bista ku nos mes ta gusta i opinionnan di "opinion leaders", pero ta sali for di e eksperensia- i opinionnan di e hendenan ku ta traha i biba na Kòrsou. Den e buki ta bini na palabra hendenan ku nan famianan ta biba ya mas ku tres generashon na Kòrsou (e Yu di Kòrsou), hendenan ku a bini for di Hulanda (e hulandes europeo) i hendenan ku den nan desaroyo ta mará na tantu e parti Antiano komo Hulandes di Reino. E buki Yunan di Kòrsou ta resultá e ora ei di ta muchu mas nuansá i kompliká. E buki ta ofresé un bista den algun aspekto interesante manera e karakter multikultural di Kòrsou, relashon entre integrashon, diferensiashon i fragmentashon di e komunidat, desaroyo di e identidat kurasoleño i e karakter di estilo di gobernashon kurasoleño i hulandes. Den sierto sentido e buki ta enserá di e manera aki lèsnan pa tantu e komunidat Antiano komo Hulandes: Kòrsou komo spil. E buki aki a ser skirbí pa tur hende ku kier siña konosé Kòrsou mihó i no ke aseptá imahennan superfisial di solo, playa, pobresa i ayudo hulandes. Ohalá e buki aki por yuda e hulandes europeo salta e abismo entre konosementu ku e mes ta preferá i komprenshon pa e realidat lokal. E por ta útil pa polítikonan, empleadonan públiko, ekspertonan i turistanan. Pa e Yu di Kòrsou e buki ta ofresé un vishon di su mes komunidat. E por yuda duna e tradishon oral di e bèrdat di Kòrsou un lugá. «